股神畢菲特講過，潮退時便知誰沒穿泳褲。英超快車期今晚到了終結，意想不到係一直「裸露」嘅愛華頓卻有機會成快車之王，今尾輪迎戰包尾嘅保頓，博其繼續小勝。
死頂無用，也無強弱之分，見英超列強兩周踢4場，也在潮退中的窘態。最心酸係見到入球機器尹佩斯，慘遭阿仙奴領隊雲格勞役足360分鐘後；戰至前晚對富咸，下半場已成強弩之末。佢嘅隊友、客串右閘嘅原中堅佐羅同樣慘情，一次鏟波疑似拉傷鼠蹊，死撐嘅結果係焗住犯規被罰出場；之後以寡敵眾換入更廢、雪到硬晒既另一中堅史基拿斯踢閘又孭鑊。阿仙奴這夜先勝後敗，雲格這位英超史上最長壽領隊「2哥」難辭其咎；此刻最重要非亨利回巢或科隆射手普多斯基加盟，再不添回有份量左右二閘，防線只會繼續出醜。
最長壽領隊、紅魔費Sir也好不了幾多，大炒韋根後以為繼續用中場扮後衞對弱旅一樣掂，接戰主場對布力般賽前，先安慰對手嗰位弱雞領隊不應被炒，後有一班妙齡男女開波前大唱生日歌，營造一個「依絲啅」嘅勝利派對，小弟也上當了。原來成個快車期都圍繞「主攻無用，穩守突擊博懵最實際」，70大壽之日締英超今季最冷戰果，爆。
潮退時，方知大家都沒穿泳褲，中堅尼曼查維迪或已收咧，現階段出邊位幼齒龍門都充滿危機；若真的莫財不添中堅及中場Keyman，1月後嘅曼聯會再被曼城拋離。而今晚作客回晒塘嘅紐卡素，紅魔亦極難踢；幸對手喺5萬多擁躉強力撐場下，撼強隊通常唔會亦唔識死守，曼聯肯出番上次無厘頭缺陣累捧場客嘅朗尼，捧入球「大」作重心等睇好戲。
同晚，近季擺明莫財、露晒底嘅愛華頓若贏埋保頓，會以近4戰10分榮登快車之王。自02年上任、貴為第3長壽英超領隊嘅莫耶斯絕非省油的燈，對上5季排名係7/8/5/5/6；季初走埋大腦阿迪達，只靠未熟土炮配來自五湖四海嘅二打六外援，以為衰硬，不經不覺又上番前10。踢法沉悶但穩陣至上，食正快車期搶分模式，對上3戰入3球失1球，迎保頓主W冇肉食，不如博小勝開[-1]和，有分頭值得一試。下次見報日期(7/1)
文：蘋果波神
今日重心推介
熱選：紐卡素大(1.75)
冷選：愛華頓和[-1](3.45倍)