被無綫超級冷待到放在雪櫃足兩年的破格劇集《天與地》，雖然開播以來收視低至幾近腰斬，但口碑一日比一日好，尤其前晚大結局，沒有爛尾兼且達神級水準，多段對白有明顯的六四隱喻，香港觀眾未睇到之前，劇集已因此遭內地禁播，證明內地有關當局原來早有「先見之明」。
無綫破格劇集《天與地》前晚連播兩小時大結局，雖然前一日在YouTube有得睇，但網民仍揚言要再睇推高收視，尤其此劇之前遭內地有關當局指有隱喻六四之嫌，在越禁越要睇的情況下，結局更受關注，且沒令人失望，甚至被捧為神級結局，特別是多段對白不單只是隱喻，簡直是公然挑戰內地。最為人讚嘆的有佘詩曼精采的「和諧論」，劇中阿佘說：「和諧唔係一百個人講同一番話，係一百個人有一百句唔同嘅說話，而又互相尊重。」講出不少香港人對自由民主的真正睇法。
當權者恐人民唔聽話
還有CCRadio技術員戴耀明為佘詩曼臨時插播搖滾音樂節，為免被台長戴志偉阻止，將自己反鎖在直播室內說：「大家家聽到嘅砰砰聲，就係強權同制度下嘅代表，係封建制度下嘅當權者，佢哋最恐懼嘅，就係佢哋管治嘅人唔聽話，外邊嘅人有自己嘅想法，有自己嘅主張，我哋每個人都係自己嘅主人，有權主宰自己嘅路嚟行！」網友直指砰砰聲等於六四槍聲，而天、地二字本身筆劃亦是4及6劃，擺明為「平反六四」而來，驚嘆編審周旭明及監製戚其義如此夠薑，但也估不到內地有關當局早着先機，將劇集禁播。
結局另一焦點是將「鼓佬」林保怡的角色投射到一隻黃狗上，黃狗在劇中曾出現三次，金燕玲想送成魔後的林保怡一層豪宅，保怡看到地盤外的一隻黃狗，感覺如同看到自己，及後地盤竣工，保怡見到黃狗在路上被車撞到奄奄一息，知道他日自己沒有利用價值時，同樣會橫屍街頭，直到最後他變回好人，為救小孩而遭車撞碌落樓梯，他臨死前黃狗再現，寓意他做回好人後，黃狗便存活過來。保怡死後，傷心的陳芷菁得知獲救小孩叫家明，知道做壞人自有報應，哭着要求小家明將來定要做好人。劇中多次出現隱喻，難怪師奶觀眾睇唔明而收視欠佳，而緊接是今日播出的《缺宅男女》，師奶劇又抬頭了。
因阿佘的「和諧論」太精采，網友即時將之譯成英、法、日、西班牙及葡萄牙文版本，而在YouTube的大結局，短短三日便有超過14萬次點擊，無綫也首次罕有地「徇眾要求」將整套29集《天與地》上載到MyTV讓觀眾重溫，為期一個月。雖後知後覺，但總算有做嘢補鑊。
和諧論慘被內地河蟹
阿佘昨日到元朗出席活動時，談到劇集在內地遭禁播，坦言感愕然及可惜，同時也奇怪YouTube早一日將結局上載，但她不相信是無綫故意外洩的傳聞，阿佘說：「唔多唔少都會影響收視，不過唔緊要，口碑好又迴響大，做咗城中熱話已好成功。」至於她的和諧論曾在內地網上瘋傳後遭河蟹，她表示不知箇中原因，只記得當年劇本日日飛紙仔，收到只記熟及諗演法，沒理過對白是否敏感。問到可擔心影響她往內地發展？她說：「做演員係被動，拍劇諗唔到咁多。」編審周旭明對普遍觀眾接受結局感高興，他昨日接受本報記者訪問時笑言：「收視喺預期低之中再低，我冇乜收視壓力，客觀環境係咁，唔能夠改變觀眾假期外遊嘅習性，劇集完咗就告一段落。」至於官方網上載整套劇，周旭明相信是公司今年新的處理方法。
另外，唱主題曲的黃貫中前晚直認劇集令不少人認識他的歌，他說：「我着住件虎紋衫經過間車房，有人整車阻住我行，我話唔該借借，車房個職員即刻對住我講《天與地》正，呢兩個月唔少人同我講。」
梁乃鵬：帶出人性
無綫行政主席梁乃鵬昨日表示也有欣賞《天》劇，但他表示從中看不到政治隱喻，他說：「係一個創新唔同嘅劇集，帶出人性警世，知道傳統觀眾未必接受，對收視都有失望，但有觀眾亦反問點解唔創新，所以好難滿足觀眾。」
採訪：丁寧、黃曉妍、馬建華
醒神金句熱爆全城
Dr.Dylan在劇中金句：「Thiscityisdying﹗」熱爆全城，但其實劇中還有不少發人深省的金句。
1.「Thiscityisdying,youknow？」
2.「和諧唔係一百個人講同一說話，和諧係一百個人有一百句唔同嘅說話之餘，而又互相尊重。」
3.「過去嘅事係要嚟回味，唔係要嚟逃避。」
4.「唔同嘅決定會行出唔同嘅路，但我相信到最後佢哋都會喺同一個終點出現。」
5.「點解人大個咗之後，就要咁多妥協？咁多考慮？咁多理由去面對現實先叫『正常』呀。」
6.「人嘅銀包係用嚟裝銀紙，唔係用嚟裝廉恥。」（圖）
7.「香港人最擅長係乜？係善忘！」
