年頭年尾最多十大新聞、十大歌手選舉，舊年12月20號，華華都喺度同大家公佈，趁年尾搞個「終極中環我至靚」選舉，喺過去逾百位被中環我至靚攝入鏡頭嘅靚女入面，搵出最多人like嘅女神。華華仲叫各位中環麗人，趁仲有幾日，記得着行啲，喺中環街頭行多兩轉，等我哋嘅攝記幫你留個倩影。
根據蘋果官網嘅點擊率，「終極至靚」終於出爐，同上次預告嘅分別不大，頭6位都冇變，榜首仍然係大熱嘅法國礦泉水金髮PinkLady，得票11,333，拋離第二位嘅背心裙OL有成333票。
連奪三甲兩位置
華華嘅呼籲，應該有中環靚女聽到，排第七同第十嘅佳麗，都係12月20號之後被攝記獵入鏡頭，其中排第七嗰位更加係12月20號喺戲院里被攝，翌日刊登嘅靚女。
今次呢場「終極至靚」，仲要多謝利世民同金手指孫柏文，尤其係見盡各國佳麗嘅孫柏文，佢認真眼利，一睇就發現，第一位同第三位嘅金髮PinkLady係同一人，正如利世民所講：「咪即係攞完最上鏡小姐再攞冠軍囉！」網友以行動選出嚟嘅，果然實至名歸。
值得一提嘅係，曾幾何時好多人都話「中環我至靚」嘅捧場客，都係睇靚女身材多過留意外貌，仲話呢個欄目應該係「季節限定」，入冬後要暫停。結果發現，入十大榜有4位至靚係12月女郎。
李華華
mailto:[email protected]
