華叔安息一周年，所有民主戰友噚日空群出席華叔追思禮拜，曾經同華叔出雙入對、一齊燒過《基本法》又齊齊喺立法局落車嘅民主黨創黨主席李柱銘自然唔可以缺席。但八方發現久未露面嘅馬丁略為消瘦，行步路都慢咗，到場後更加冇接受訪問，一支箭咁坐喺涂謹申隔籬。原來向來大膽嘅馬丁最近做咗割膽囊手術，身體虛弱，好彩仲識搞Gag話自己已經由大膽變為冇膽，證明風趣作風依舊冇變。
現身華叔追思禮拜
未喺馬丁自爆抱恙在身時，負責主禮嘅牧師朱耀明已經大爆呢位民主老戰友呢幾日啱啱做完手術；噚日朝早仲打畀朱牧話嚟唔到，點知轉個頭就出現，令人既感動又驚喜，證明華叔喺眾人心目中嘅份量好重。
散會後八方即刻追問馬丁詳情。佢話幾日前做完割膽囊手術，自嘲由「大膽變冇膽」；由於一直當華叔係「大佬」，所以就算帶病在身都要嚟追悼。雖然馬丁不斷強調自己冇事，但接受訪問時全程氣若游絲，未答完記者提問就匆匆離開會場，冇去到歌連臣角紀念花園拜祭華叔。
唔好食咁多肥膩嘢
馬丁早喺去年初因為腰痛而發現生膽石，本來諗住戒口同埋減食量可以避過一刀，點知去到舊年9月已經落晒形，透露區選前做手術，結果拖到去年尾先利用微創手術割膽囊。
瑪麗醫院肝臟移植中心主管盧寵茂話生膽石好常見，65歲以上男性平均每十人有一人生膽石；家嘅微創手術好先進，基本上一個鐘搞掂，留院觀察一晚就可以出院，傷口好快復原，連藥都唔使食，只要唔好再食咁多肥膩嘢就冇問題。盧醫生仲話如果膽囊已經冇咗功能，割咗反而對病人嚟講會安心啲，八方聽完之後都安樂晒。
mailto:[email protected]