新年流流，死死聲梗係覺得唔多「老黎」，但係一隻《死神5來了》3D藍光又確係新一年必睇刺激之作。講劇情，係就係冇乜新意，不過講到聲畫3D效果，表現就實屬上佳之作！一幕幕驚心動魄的死亡場面，配合臨場感十足的聲效，帶來極級官能刺激，新年睇完，人都醒神啲！
記者：韓繼聰
攝影：伍慶泉
3D聲畫震撼觀感
同一條橋究竟可以翻兜幾多次？《死神》系列話畀你聽，係五次，而且極有可能繼續。同一個劇情佈局，有睇過前四集嘅觀眾都會知，最有看頭的一定是開場一段主角預感中的大災難，《死神5來了》當然都唔會例外。今集玩斷橋，核突死法唔少得，而佢嘅音效更係令你恍如置身現場一樣。華仁影音阿傑就話：「呢隻碟嘅音響包圍感十足，畫裏畫外嘅聲音都聽得一清二楚，營造到極佳嘅現場感，夠像真，表現出好強張力。」當中鋼纜逐條斷嘅場面，更係盡顯音效的準確方向感，觀眾可以清楚聽出每條鋼纜由遠至近逐條飛埋身，震撼之餘，嚟得乾淨清晰，距離感表現相當好。除咗斷橋，埋尾飛機爆炸一幕亦係必睇，低音夠晒勁，但唔會過份誇張，做得自然流暢。另外，值得一讚就係，除咗大場面夠勁，在靜態表現亦同樣細緻，整體音效表現，阿傑都給予高度評價。
斷橋一幕值回票價
近年3D戲熱爆，唔少電影打住3D旗號，但實情係混水摸魚之作，人同景係咁意分兩層就話係3D。好彩《死神5來了》嘅3D效果並不馬虎，頭段斷橋可見3D感豐富，多層的3D效果令畫面表現出充份層次。「畫面前後立體感做得好真實，細緻度亦相當高，完全無『起渣』嘅情況出現。」阿傑邊睇邊講。雖然之後的3D效果相對比較平淡，但頭段的大場面其實已值回票價。
劇情方面，當然地沒有驚喜，同樣係主角們逐個被死神以離奇方式奪命。不過今集由頭到尾原來都有一個小佈局，到尾段揭盅，算喺編劇上花過一點心思，值得觀眾留意。另外，Bonus方面亦同樣驚喜不大，未曝光鏡頭，製作特輯自然唔少得，仲有特技效果前後的比較畫面，感覺幾有趣。
死亡藝術
