中大國際（909）董事會內訌又有新發展，話說由於涉嫌挪用1.5億人仔公款，被停職調查嘅中大國際前主席徐連國，想召開股東特別大會（EGM）罷免現任董事會郭明輝等6個人，點知俾人「將軍」。
EGM開不成 欲罷無從
原因係，開EGM之前要向各股東寄通告同通函，中大國際話，由於徐氏未能提供所需資料，搞到出唔到通告同通函，為免觸犯上市規則，所以唔可以開EGM。
徐連國係中大創辦人，細佬徐連寬係前副主席兼行政總裁，舊年中大董事會內訌，兩人因為冇辦法交代一筆1.5億人仔資金去向而被停職，跟住董事會就大執位。今次徐連國開唔成EGM，睇怕唔會咁易罷休喇。