陳冠希模舊愛Cammi（謝芷蕙）「舌吻」抽水大豐收，人氣持續到年尾，前晚大除夕以一身騎呢聖誕女郎look喺尖東倒數搵真銀，同場仲有樂隊Mr.同埋鍾舒漫等。
大會司儀問到愛集郵嘅Cammi新年會否識新朋友，全場即噓佢喝倒彩。馮仁昭問佢噓聲迎新年，Cammi即扮懵話：「聽唔到，唔介意，唔會覺得難受。」問佢有冇祝Edison新年快樂，佢話：「冇聯絡啦，我電話更新洗咗機，冇佢電話，不嬲冇佢facebook，微博都冇關注佢。」
被指帶壞新人
自言冇人追嘅Cammi仲話希望新一年可以大紅大紫有幸福，仲錄咗首新歌《KissMeMissMe》。對於日前同狄易達師妹蔚雨芯（Rainky）一齊睇演唱會，俾人哋個經理人話佢會帶壞Rainky，周身是非見慣大場面的Cammi笑笑口講：「Rainky有請我去生日派對，佢請我睇concert，我細過佢，唔會帶壞佢，我同佢係普通朋友，希望新年是非遠離，有新嘅形象。」
