賭王何鴻燊有4房人共17個仔女，八方已經覺得佢好巴閉，但係原來民主黨何俊仁個阿爺仲巴閉過賭王，足足有成六房人共19個仔女，仁哥嘅老竇就隸屬「六房」，排第18。仁哥話阿爺身處於上世紀清末年代，當時一個男人閒閒哋有成六房人絕對唔罕見㗎。原來佢阿爺係生意佬，又係大地主，喺海外都有生意，有錢又有地，唔怪得可以引死女。
長者讚靚仔當回禮
仁哥噚日就同埋老表一齊去九龍灣一間安老院，探望現年92歲嘅姑媽，佢仲以幾盒西餅兼生果做賀禮，巡遊老人院同向姑媽嘅老友記大派新年禮物，有長者大讚仁哥相當「靚仔」當做「回禮」。
今次去到安老院，當然唔只探親咁簡單，仁哥係想了解長者生活，強調下任特首一定要解決長者輪候資助院舍嘅問題，大鬧家長者要等六年先至可以入住政府資助安老院舍真係等到「頸都長」，如果佢當選，都希望將輪候時間縮短至不多於三年，仲建議短期內將工廈改建為長者院舍，叫政府推出好似幼稚園嘅學券嘅「院舍券」，資助長者自行選擇入住私營安老院。