2012年與各位第一次見面，謹祝新的一年安定繁榮，宇宙和平。說實話，這些普世祝願噏吓就算，幾何能認真，除非係李生好嚴肅地私下拍着閣下的膊頭祝你財源廣進，咁喺李氏力場的護蔭下應有作為。點都好，我們都樂此不疲，正如六合彩的投注永遠都是一些人的生存希望。過多廿多天，恭賀的說話更加排山倒海，傾巢而出，不過家陣嘅後生話晒一年都冇幾次可以咁輕鬆落袋。
其實自己不彈「許願」此調甚久，但這兩年反而湊熱鬧除夕午夜特地跑去倒數，藉機盡興一番，然後趁半夢半醉半醒之際，就趕赴石澳，看元旦日出，雖然明知個太陽同其餘364日並無不同，正如嗰啲零時零分出世嘅BB亦無異稟。要不是去年盧太因為伴我頻撲而冷親，跟住抱病至農曆年，之後就落埋禁制令，今年本來仲諗住披星上鳳凰山觀日。不過聽友人講番，當天鳳凰頂上仲熱鬧過旺角，真係點「劏」個山頂房都安頓不了一眾人士。始終是青春玩意，我們這些一把年紀的還是算了吧，幸好打消念頭，不然掃興之餘仲白白辛苦一場。
付出代價才有收穫
雖則我還是認為，有些事情總得要辛苦和付出代價才有收穫，正如經濟學名句：「There'snosuchthingasafreelunch.」所以節日祝願除了聊以增添氣氛外，實在說不上有甚麼實質或經濟價值。反正言者縱然有心，而聽者豈能在意。
不過有時我自己卻會好在意，譬如有負責前線業務的同事，大時大節祝我生意興隆，我就會很認真甚至有點激動地想握緊他的手說：「咁就要拜託你了，你開拓多啲業務，跑到多啲單，公司生意就會承你貴言。總之你好就公司好。」
很多時候新入職的同事都會定不過神，不知所措，就咁俾我食住上，攻其無備趁機提點，即係捽數。講到尾，公司生意點會無緣無故會咁自動好咗？或者可能係大圍市況好好，或者做啱嗰行食正自由行條水，排隊收錢，但係好快就會有大批競爭者湧入，爭在做爛市前上岸。
就算係做地產，過去咁多年亦都不知淘盡幾多英雄。所以生意係要有人「做」，仲要做得好。呢個世界從來沒有不勞而獲（也是近年潮流賀語），亦不見得從心就能所欲，始終心想還要「做」成，而呢句先係我心底實事求是的新年祝福語。
盧先亞