唐唐未登天子位，先做金句王，令大家忽視咗本港政壇近年冒起嘅國產金句王──中聯辦宣傳文體部部長郝鐵川！有別於唐唐嗰種九唔搭八真灰諧，郝天王嘅金句較重口味，鬧人句句到肉，但通常佢好快就發現自己講大咗，要急急改口兜番。佢嘅個人微博係金句泉源，好可惜剛踏入2012年，呢個微博就不幸「注銷」了。
網民話要起佢底
郝鐵川喺新年之始就向網民送上「噩耗」，佢推稱因為貴人事忙，所以要從此「封筆」。佢話好多謝各位網友咁關注佢喎。至於會唔會再次執筆？郝鐵川向傳媒表明，唔排除有時間會再恢復，似乎對呢個意見表達嘅「地盤」都幾依依不捨。八方噚日都試過上郝鐵川嘅微博，發現戶口已經撤銷註冊。
究竟點解連微博都唔玩？有政界中人估計未來一年係特首同立法會交接期，郝天王謬論每每令社會譁然，由早前喺微博話國民教育就係要「洗腦」，到批評美國駐港總領事館旨在要「把香港搞亂，分裂出去」，唔少建制派聽完一額汗，話好彩唔係正值選舉期以免被拖累。
郝鐵川喺「封博」前嘅佳作，就喺幾日炮轟鍾庭耀有關港人身份認同嘅民調，質疑佢點解唔問吓受訪者覺得「現在你是中國人還是英國人」？搞到有網民話要同郝鐵川起底，睇吓佢屋企人有冇外國護照。
左報大鬧鍾庭耀
而為咗響應郝天王嘅召喚，本港兩大左報喉舌《大公報》同《文匯報》，近日都將矛頭指向鍾庭耀，大鬧鍾博士唔應該喺3月23日舉行特首全民投票，話咁樣係挑戰憲制，八方唔知鍾博士會唔會步學者成名後塵，成為左報批鬥對象，但肯定郝天王嘅一番謬論後，會有更多人想做英國人囉。
mailto:[email protected]
忘不了郝鐵川金句
2011年3月
「越來越多人理解和認同內地政府對六四所做的結論」
（接受新浪網訪問時辯稱越來越多人認同內地處理六四的手法）
2011年5月
「有人說是洗腦，只要看看美、法等西方國家這方面的制度，就會看到這種必要的洗腦是一種國際慣例」
（微博發謬論力撐實行國民教育）
2011年9月
美國駐港總領事館在港旨在「把香港搞亂，分裂出去」
（微博發謬論斥美國駐港總領事分裂香港）
2011年12月
「建議鍾先生應設這樣的問題，現在你是中國人還是英國人？」
（與傳媒茶敍暗批鍾庭耀的調查顛覆中央）
資料來源：《蘋果》資料室