世界排名跌到歷史新低嘅香港隊，踏入2012年，成功重奪省港盃冲喜下，而港隊大軍帶住冠軍獎盃，已喺噚日朝由惠州凱旋返港；不過，賽事餘波未了，原來係廣東球證犯錯，間接幫咗港隊爆冷捧盃。
球證犯錯唔畀換後備龍
我求大俠睇省港盃多年，差唔多每次廣東主場，球證都會秤先主隊多少，直到呢兩屆情況先至冇咁嚴重，不過，前日次回合就懷疑因為球證唔識球例，喺互射12碼時搞到仲有一個後備名額未用嘅廣東，唔可以用後備龍李偉軍替受傷嘅楊智把關，勞煩要中堅王偉龍做替工守龍。
其實省港盃每個回合前，兩隊照例要舉行領隊會，兩軍除帶埋預備着嘅波衫去開會外，另外，亦要傾好今次賽事可換5名球員同不設作客入球，其餘就跟晒國際球例；前日港隊同廣東喺120分鐘打成0:0，要以互射12碼決勝，而主隊門將楊智先後擋出港隊李志豪同梁振邦嘅射門後，因為右肩一傷再傷唔可以繼續。
「亨利」暗笑球證出錯
廣東教練曹陽見球隊仲有後備名額，就叫後備龍李偉軍入替，第4球證亦舉晒牌，但擾攘咗成分鐘都換唔到，我求大俠現場睇到，原來廣東球證最後話唔准，主隊惟有搵場內球員王偉龍頂替。港隊前鋒鄭少偉事後笑笑口話即場已知球證出錯，但難得有主隊球證幫拖，令到餘下主射球員只對住個棄足用手嘅中堅，信心自然大增；最後幾輪入晒，加埋「英雄輝」葉鴻輝神勇撲出廣東隊射門，就咁12碼贏5:4搞掂廣東，令港隊重奪冠軍。
當然，球證錯判或睇唔到不時都有，但好似呢位球證錯誤執行球例確實少見，而足總董事兼前國際球證伍健賽後響Facebook講，呢個可能係場波最後勝負嘅關鍵呀。
互射12碼知多啲
在互射12碼決勝時，如門將受傷，到底可否更換門將呢？據前香港國際球證及球證導師陳譚新表示，其實在互射12碼時是可以換出受傷的門將，但首要條件是尚未用盡換人名額；如名額已用盡，門將又未能繼續比賽，便要由場內球員頂替。