新年伊始，銀行公會主席將會換班，今年特別有睇頭，原因係銀公將會有首位女主席。佢同時亦係滙豐銀行首位華人女大班、香港區行政總裁馮婉眉（Anita）。伊人今個禮拜五就會首次以銀公主席身份亮相，主持例會。
心情戰兢「好榮幸」
銀行界正值風高浪急之際，Anita負起領導業界乘風破浪嘅重任，佢以戰戰兢兢嚟形容當下嘅心情，仲話：「我係香港金融界土生土長，好榮幸、好興奮喺呢個好有意義嘅時刻接任，希望對銀行業界有所貢獻。」
Anita平日好低調，以往曝光率唔多，近日佢同傳媒預覽銀公新一年工作時，講嘢從容淡定，面對記者多角度追問，回應得體，睇嚟應付銀公主席嘅工作，佢應該遊刃有餘。