唐牛今年首次同大家見面，先祝各位戰友新年進步，萬事勝意。
近月無論股市同樓市，都係悶到冇朋友，成交欠奉，不過到咗去年尾，由信和置業（083）牽頭既新盤御金．國峯，為淡市帶來一點驚喜。
呢個位處油麻地嘅樓盤，首批單位呎價仲平過同區二手樓，震撼全城，成功吸盡市場僅餘嘅購買力，最新數據顯示，落實成交連預留單位，已經佔整個項目四成有多，而且仲有力加價加推，係咁嘅市況下，算係有交代。
信置頭尾彩都攞晒，雖然成個盤賣晒，套現金額都未必夠100億銀，唔算太多，但股價已經先行發力，上周累積升幅接近半成，明顯跑贏大市，上星期五收報11.06元，升0.55%，20日線快上破50日線，出現第二個黃金交叉，強勢畢呈，成交亦配合。戰友可趁勢於11元水平吸納，目標先睇12元，跌穿10.50元止蝕。
唐牛