長期讀者Ｆ來郵，問壬辰年以正月初一（一月二十三日）為準，還是以立春之日（二月四日）為準。一般嚟講，大家跟隨農曆日曆，到了寅月初一，便是新年，但以節氣計，月份未到立春，還是丑月，故此計算八字，在一月二十三日出生嘅話，還是辛卯年辛丑月癸未日出生，屬兔，要在立春之後出生，先至係屬龍（二月四日下午六時二十二分）。
歲末星期五，金融Ａ請吃午飯，過往大家公事繁忙，午飯一定係在中環吃，但三個星期前約會之時，金融Ａ諗住年尾比較得閒，下午可能冇會開，建議：「唔好咁悶，去遠啲食都無妨。」既然如此，就去沙田馬會百駿廳食西餐，行西隧，二十分鐘就到，金融Ｍ連聲叫好，因為佢太耐冇「出城」去沙田嘞，不知道去沙田係咁方便，好似同去山光道馬會差唔多（馬路塞車吖嘛）。好就好嘞，但在車上已接到電話，有急事要下午開會，金融Ｍ唯有嘆一口氣，唔可以食一個longlunch咯，食完甜品就要急急腳鬆人。早知道就在置地廣場開餐啦，駛乜要往來沙田？金融人物就是如此生活，不少事件要快快趣解決，市場不容許拖延片刻。中環講求高度效率，以維持國際金融中心地位，辛苦咗邊個，咪係市場人士如金融Ｍ囉。
金融Ｍ久坐辦公室，做到烏天黑地，一旦坐在百駿廳，玻璃窗外就係馬場/彭福公園，望出去真係心曠神怡，金融Ｍ話成個人鬆晒，精神為之一振，好過去山光道馬會打吡廳黑鼆鼆咁話。既然神經鬆馳咗，食慾大振，先飲龍蝦濃湯，再吃燒羊髀，金融Ｍ連聲大讚高水準，本來可以慢慢嘆嘅，為咗趕返中環處理急事，擒擒青吃完甜品就埋單上車。想起昔年在馬尼拉見客，在半島酒店吃午餐，食足三小時，夥計樣樣慢條斯理，最急嗰位就係來自香港中環嘅左丁山，因自己吃到不耐煩，頻頻望手錶也。菲律賓人會笑我地不懂享受，我地鬧菲律賓人無效率，彼此好難調和。
坐車返到中環，人都行快幾步，彼此匆匆而別，金融Ｍ話睇吓幾時再有空到沙田馬會吃午餐慢慢嘆，恐怕起碼一年後咯！