蘋機會:周街冒險挖寶藏 手指公爆機

蘋機會:周街冒險挖寶藏 手指公爆機

對唔住,我錯!未玩前,因為啱啱玩完超靚嘅PS3版《Uncharted3》,所以我覺得喺PSVita玩《Uncharted》外傳有啲多餘,但玩落發覺5吋芒一樣精細,點擊畫面、用隻手指公畫過畫面捽死敵人,的確快感倍增,拎出街玩眾目睽睽依然煲到失盡儀態,三十幾章,眨吓眼就玩爆,跟手攞齊獎盃先叫「依拜分」!

文:阿樂

前傳故事冇死錯

有六軸感應瞄準,HeadShoot爆頭更Easy!

外傳遊戲,最方便係咩年代?前傳囉,只要結局個主角唔死,就一定攝咩劇情入去都啱數。呢隻《秘境探險:黃金深淵》都係,雖然德瑞克個樣原來一早大定咗,同喺最新一集都差唔多,但其實今次玩家係扮演初出茅廬的寶藏獵人,與老友但丁同失蹤考古學家孫女翠絲齊齊深入中美洲叢林,追查西班牙教派謀殺事件同時,揭露埋400年前西班牙遠征大屠殺背後暗藏已久嘅秘密。而同以往好類近嘅,係主角都係要喺河流、廟宇遺蹟、石灰岩層巨洞等擒高擒低,咁複雜,好彩PSVita新觸控機能幫到手。

■殺人、爬牆都靠手指公捽,超方便。

過癮謎題玩盡新機能

利益申報,我PS3版玩Easy,PSV版玩「超簡單」,難度比較低,不過解謎部份同樣好考心思,需要慢慢試。玩咗幾日,最值得讚嘅係解謎部份,發揮OLED屏幕技術,用齊底面觸碰嚟「拓印」古代圖案、再砌埋地圖搵提示,當然唔少得六軸感應同相機功能,可算將PSV新機能用到盡。更驚喜係遇過一道謎題,得張白紙,搞極都無藏寶位置,原來要將部PSV舉起,向住天花板盞燈,跟手符號謎題便會出現,嗰一刻勝利滿足感,真係令人感動得眼泛淚光!動作方面,TouchScreen真係好方便,只要輕觸敵人就可以「濕」佢幾拳,跟箭嘴掃一掃仲會嚟個上勾拳KO對方,爽!

又係我Game界跳跳虎大顯身手嘅時候!

■離遠跳過對面,都可傾斜機身嚟代替操控桿。

■咁嘅畫面質素,絕對有交代。

■火場環境造得極真實。

■過獨木橋以六軸嚟平衡。

■爬繩靠掃機背、捽住上山。

■今集加多咗埋身肉搏戰。

《Uncharted:GoldenAbyss》

主機:PSVita

廠商:NaughtyDog&BendGameStudio

類型:動作 

遊戲人數:1人