新年流流一開波講死唔多老黎，但近排港股成交弱雞真的教炒友士氣低落，12月每日平均成交唔夠500億銀，最近四個交易日更不足300億，扣除窩輪牛熊證及沽空金額，每日實際成交百餘億元。
延長交易無錯 錯在熊市出台
成交奀，港股跌，我唔會賴港交所（388）行政總裁李小加，他還未有足夠份量令港股冚包散，但講到其決策時機，就完全錯晒。無疑，香港與中國及國際接軌是大勢所趨，但事有緩急輕重之分，去年3月份首階段延長交易已令經紀叫苦連天，第二階段今年3月實施，中午食晏減至一句鐘，相信更加無啖好食，傾唔到生意，索性唔食好過。至於計劃推出的期貨夜市，其實亦只會玩死證券行，夜晚交投淡靜又要人輪班睇檔，人做你唔做，做又死唔做又死。
我唔反對延長交易，但唔該不要揀成交奀豬的熊市推出，無論大戶或散戶，唔怕跌市最怕陰乾市，牛市炒股，時間過得特別快，但熊市當下，無得炒卻要長時間對住股票機，份外難受。
無可否認，現時李小加所做的事具前瞻及策略性，冀藉此增加香港股市在國際股市上的叫座力，可惜這邊廂搶客、那邊廂監管未有與時並進，眼見漏洞卻不去堵塞，無關新股、衍生工具及沽空，把關能力奇差，縱贏了新股集資王、輪證成交王之名又如何，到頭來「李」攞彩、我付鈔。
統計去年上市新股，70隻共有53隻潛水，潛水比率75%是歷來新高。港交所近年積極向外游說誇國巨擘赴港上市，更不惜大開綠燈放行向外招手，去年引入的嘉能可（805）、Prada（1913）集資額最多，表現卻令人失望。更慘是部份上市前業績「誇啦啦」，但到派業績竟迅速走樣，誠如中信証券（6030）早前公佈季度盈利瀉74%，招股時疑似隱瞞季績不濟，另外去年超購王豪特保健（OTO，6880）半年亦少賺32%，半年盈利僅及招股書預測的25%。港交所與其花心思在接軌加時討論，不如加強監管守尾門更實際。
至於去年加劇跌勢元凶之一的沽空，相關規定更令大戶如魚得水，現時港交所每日會公佈兩次沽空額，但可笑是從不披露補倉平倉情況，散戶可借貨，但券行通常唔會騷你，就算肯借亦要付高息。沽空盤只能透過自動對盤系統成交，不能在股票報價機上顯示。建立中央股票借貨沽空系統是解決方法之一，可是港交所指今年始就此展開內部研究，要長遠研究，短期不會有具體方案。
炒得股票，輸贏自負，筆者其實只要求一個公平的賭枱而已，你畀我賭耐啲，意義不大。作為大莊家的港交所，還請你做些有意義的事吧！
股榮
