十二月廿八日，「蘋果」老總沙膽虹批判左丁山言論，有老友晨早來電，替左丁山擔心：「會唔會炒咗你，等你冇地盤妖言惑眾？」呢樣唔駛驚噃，自九七年至今，唔經唔覺寫咗十四年，要炒亦冇辦法，爬格子動物並無終身僱用制，稿匠寫專欄純係市場主導，一旦所寫嘅嘢冇收視率，殺無赦啦，老闆邊度會手軟㗎，炒慢一日都嫌遲！之不過咁，講到政治，左丁山素來係民主派，基本法徵求意見時已極力反對設立功能組別，但基本法草委會當我地儍嘅，當然反對無效，當年草委會中人，邊個仍然活躍於政壇？咪係「民望」甚高，去到41.8%嗰位振英哥囉。功能組別乃係政治怪胎，一放難收，全世界都唔會有一個利益界別願意自動放棄政治利益嘅啫，必然極力抗拒解散，此乃今天之政治現實，香港議會無能力解決之。除非北京有一紙命令頒下，要限時限刻解散功能組別啦！但如果係咁嘅話，香港社會又會有大把嘢講，隨時有人大罵北京專制專橫！
當年擁護功能組別之梁振英，受民意支持41.8%；當年至今始終不變，極力反對功能組別之何俊仁，民望支持率係5%，真係聞之傷心，中產精英支持之民主派選委尚且得到205席，佔總席數近17%，何故民主黨主席何俊仁在普羅市民中嘅支持度竟然低得可憐？是否何俊仁不濟事？是否香港市民對民主無好感？假若換上余若薇代表泛民競選特首，余大狀嘅民望會否高過梁唐二人？可惜呢，無從解答。公民黨阻住香港建設之形象，（高鐵、港珠澳大橋、政府西翼重建、第三條機場跑道等事，公民黨有關人士全部反對）深入民心，在區議會選舉與選委會選舉，都敗得灰頭灰臉，於是公民黨唔敢話參加泛民特首初選，現在由馮檢基鬥何俊仁，對選民全無叫座力。
民主派人士必須認識到，搞選票不能只靠嗌漂亮民主口號，六成選民（所謂六四選舉鐵律）支持泛民多年，但泛民對內鍾意內鬥搞分裂，對外喜歡提出社會主義政策，似共產黨多過似香港資本主義，中產見到無不驚怕，因住明年立法會選舉大敗呀！