12年新年快樂！告別風高浪急的2011，正式踏入這個明天在你我的2012，甚麼是真正的Tomorrow？潮流界轉吹咩風？末日預言會否應驗？一大堆問號由一眾副刊編採組例點報上，具體過唐豬日日改的政綱。袋住過新一年，保證好嘢唔會走漏眼。
記者：雷福財、陳慧敏、許福合、陳國輝、徐影龍、韓繼聰
攝影：林栢鈞
模特兒：LenaPr@StarzPeople
化妝：呂旻熹
髮型：[email protected]
服裝：Fendi（25241339）
1 12月21日世界玩完？
相信今年講得最多，人人最期待但又最唔想發生的事，顯然落於瑪雅末世預言上。根據瑪雅人民族的日曆推算，地球經歷了四次末日，最後一次（即第五次）將是瑪雅曆3113年，即是西曆2012年12月21日，地球將進入第5個太陽紀，一切將重新洗牌，令不少末日分子相信屆時地球南北兩極將顛倒、地震海嘯、隕石空降等，令人類大規模滅絕甚或消失地球上。但不少考古及歷史專家則表示瑪雅從未在碑文上寫下末日語句，而紀元結束，開始新一紀元則像中國生肖年份，互相循環不息。正所謂要來擋不過，既然如此，何不盡情做所愛的事。
2 大英熱
一講，最大鑊自是2012倫敦奧運，還要撞上女皇登基六十周年慶，於是當地活動都順應加碼。
倫奧將於7月27日至8月12日舉行，亦是倫敦第3次拿下主辦權。首先奧運火炬將於當地時間5月19日起於英國境內傳遞，為期70天，95%市民最多花1小時就可到達鄰近的聖火會場。據說倫敦酒店將比現在增13%房間，住宿將不如想像的貴。
6月則慶祝英女皇登基60周年，到時除白金漢宮外，更會有扮晒十七、十八世紀，長64米的「王室之舟」豪華遊船EIIR，領着上千艘艦隻沿泰晤士河遊行。
未完的是那條在《國家地理》雜誌評為「全球最美海岸景觀」第二名的威爾士PembrokeshireCoast，長達250英里的海濱步道也於2012年落成，係咪擺明英國熱先？
3 iPad3賀教主生日
蘋果產品一向玩神秘，惟有推出周期有規律，i系列一年一機已成為慣例，好似iPad3，唔少人都估3、4月推出，最近又有新傳聞，話會在2月24日這個特別日子推出，有咩特別？這日是蘋果教主SteveJobs生日，正好紀念吓喎！至於有何新功能，暫時傳得最熱係會有Retina級高清屏幕及更快的處理器等，作為蘋果Fans，真係好心急！
4 無框iPhone5
網上一直瘋傳蘋果iPhone5照片，更言之鑿鑿咁話，屏幕闊度將提升至4吋或以上，並加入臉部識別、HDAudio以及4G/LTE高速數據傳輸技術。究竟幾成真，幾成假，大家無從得知，但睇過幾張由網民精心設計的圖片，特徵都是屏幕大了，而且幾乎為無框設計，難道這就是大家期待的iPhone5？
5 Karl發冧功
以老佛爺KarlLagerfeld的殿堂地位，其個人品牌Karl即將發出新作，1月25日推出，服飾以黑白為主，想買嘅，就Click上英國知名Website:www.net-a-porter.com內睇睇。玩埋個iPhoneApps，更有機會贏得1,000英鎊，爽。
6 全球選舉年
我哋有豬狼雙英對決，而台灣（1月）及美國（11月）今年同樣係大選年。香港特首將由1,200人小圈子於3月選出第4屆特首，貧苦大眾照樣有得睇無得選，唔似台灣另一雙英（馬英九、蔡英文）互相對叠，人人有得選。雖則這類大選看似與香港無關，但以美國總統人選足以影響經濟生態，全球一體化，都關你同我嘅飯碗事。
7 任天堂WiiU力挽狂瀾
3DS被iPhone打得體無完膚，要急急減價救亡，任天堂現在寄望的，必定係2012年推出嘅家用機WiiU了，能否力挽狂瀾尚屬未知之數，不過全年Game界只得一部新機，多多少少總有點話題性。WiiU最大特色，係控制器設有屏幕，恍如一部Tablet，可延伸遊戲更多變嘅玩法，更兼具顯示功能，若家中電視被霸佔，大可拎住控制器，匿喺房繼續打餐飽。
8 瑞典COS到港
繼早前Gap及JackWills新店來港開業，12年繼續有來，矚目店必數瑞典COS（CollectionOfStyle），這個H&M旗下的店舖，成立於2007年，40間分店遍佈歐洲，主力售賣Hi-endFashion品牌，今年更首度於亞洲開業，可說是繼Crossover風後，又一H&M力作。
另一專門店將於香港開幕的則屬法國Balmain，選址尖沙嘴海港城，以Rock味及注重細節見稱，難怪連韓火火最愛三甲名單中，佢都有份。一件男裝西裝褸約1萬起手，標價未至於卻步。更值得留意是其主帥OlivierRousteing，今年26歲咋，就算唔係設計天才，都一定好識Marketing。
9 馬來西亞LEGOLAND
馬來西亞的LEGOLAND已經完成了四成，這個有7個主題的新樂園，除了有例牌的過山車外，裏面的Lego主題酒店也預計於今年3月開業。酒店分三個部份：海盜、冒險同皇國。
10 男人愛爸爸
從來唔敢或無去想而發生的，生活上除咗係另一半會講分手外，男人要戴Bra應該榜上有名。與其話Bra，不如話係Accessories，個心應該易過啲。今季Julius玩皮玩洗水，再大膽撈出呢幾件Accessories。邊個Artist最快着？我相信應該係山聰哥。
11 愛拼才會潮
Patchwork向來都屬難搞之作，將不同物料、顏色、Pattern聯成一件貨，少一點功力或美感，隨時成盤貨玩完。男裝GARCONS多年來的秘技，將成為本季不少女裝重頭戲，麻布搭絲質、絲質拼牛布、藤織拼Cotton等等，原來一樣可以拼出一線潮味，色彩更見豐富突出。
12 熱褲當道
一踏入春夏系列，ShortPants熱即時嚟料。各大潮牌如Chloe、YSL、Dolce&Gabbana、StellaMcCartney等均悉數露腿上陣。女士們係時候剃定腳毛晒腿。
13 公主玻璃鞋
女人為買鞋，可以面不改容咁付出成份糧，賣鞋的自然要捉正女人愛當白雪公主的心態，今年一類以透明膠打造的高跟鞋，應該將被煲起，唯一要擔心係先執靚啲腳趾。
14 SONYNEX-7集大成
講起NEX-7的推出，可謂一波三節。早於去年年中初聞其聲，8月已首見真身，一直有傳11月就會開賣。可惜一個泰國大水災，同時冲走機迷期望，推出日期一拖再拖，有傳2012年1月才有望推出。NEX-7集SONY相機科技之大成，各項規格都屬頂級中的頂級！2,430萬像素、10fps連拍、內置OLED觀景器、三轉盤操控等等功能，補完了NEX系列的所有極限和缺點！
15 潮男齊聲吊
瀰漫多季的男裝Roll腳式穿法，相信有排Hit。睇見多個男裝品牌如COMMEdesGARCONS、JunyaWatanabe、BurberryProrsum等樂此不疲地力Show，大Roll式或吊褲腳式穿法，實行Show盡男生的飛毛腿，不過入面最好都係襯番對鮮色或Pattern襪先好出街。
