懷有三個月身孕的郭羨妮(Sonija)昨日出席無綫新劇宣傳活動，大談陀BB的辛酸喜樂。她直言最近情緒好易波動，自爆臨出門前為穿高踭鞋與老公意見分歧，但自己堅持要做靚靚媽咪。
謝天華、郭羨妮、吳卓羲、鍾嘉欣、賈曉晨（JJ）等昨日在尖沙咀為無綫新劇《缺宅男女》宣傳，活動在空中花園舉行，被本報率先踢爆懷有三個月身孕的Sonija依然好貪靚，腹部微隆，仍堅持穿上短裙加襯三吋高踭鞋，她直言出門前與老公朱少杰鬧意見，她笑說﹕「我有畀老公望吓我，佢話：『吓？你着高踭鞋呀？』我咪答：『點解唔得啫。』我都想做靚靚媽咪。」Sonija直言陀B後情緒較易波動，故老公經常要受氣。
留港安胎日日嘔
Sonija透露BB將於明年中在香港出世，這段時間會一直留在香港安胎，她說：「香港有媽咪照顧，唔會拍劇住，只會間中出席活動。只係老公辛苦啲，要成日兩邊飛。」她表示懷胎期間經常作嘔，而且口味都有改變，她說：「一日嘔一次，仲好鍾意食味重嘅食物。依家未睇到仔定女，我冇所謂，但老公鍾意女夠嗲。」Sonija亦有預早訂好床位，但仍未決定是開刀還是順產，問到可會追多幾個？她笑說：「生咗呢個先啦。」
吳卓羲買樓結婚
另外，JJ昨日遲到半小時，在台上被天華明寸：「你個角色有錢還有錢，但都唔可以遲到㗎。」JJ不停說「不好意思」兼「耍冧」，才獲大家體諒。有指吳卓羲以15萬酬勞擔任倒數活動嘉賓，問到是否儲老婆本？他說：「買樓先，無論點都會同阿媽住，因為有湯水飲同照顧貓狗，如果女友唔肯，就搵過個。」記者隨即問張馨予是否不肯與吳母同住？他笑說：「你哋講之嘛。」而羅仲謙被問除夕會否約楊怡？他說：「睇時間，係都一班人。」
採訪：黃曉妍 攝影：陳慧安