2012年元旦日開筆，謹祝各位新年進步。一位讀者Josephine來郵，話好喜歡十二月二十四日本欄講香港會飛，認為係佢之最好聖誕禮物，住在福地應知福，故此佢會俾十億個like喎。Like唔like呢樣嘢，因左丁山拒絕上FB，唔多在行，約兩個月前見何俊仁在茶餐廳開記者會講參與特首競選，講到左like右like，幾乎笑死。最近曾特首因不能按法規阻止中電加電費，索性訴諸民粹，在FB反對中電加價，請市民like反對，認真搞笑兼冇面，如果呢個方法行得通，不如凡有重大事件，都付諸公投，快啲訂定香港公投法案啦。但係，請特首及各位高官先讀一讀港大黃乾亨黃英豪基金教授（政治經濟學）/經濟學講座教授王于漸之鴻文「自由主義與民粹主義角力前的聖誕歌」（十二月二十八日信報）。王教授做港大常務副校長之時，周身唔得閒，現在專注做番教授，就不斷有大塊文章見面，有益讀者。
另一位讀者Ringo來郵指責左丁山以廣東話寫文，教壞學生，指左丁山在中大畢業，必然係中文差差嗰類學生。哈，左丁山寫文一定差過「蘋果」兩大才子董橋與陶傑，Ringo想睇優雅流暢白話文，請留意星期日董橋、鄭培凱、毛尖、劉紹銘、張大春等等文章大家嘅文字，睇左丁山睇得多，係會學壞㗎。要學好中文，有一個古老方法，就係先讀古文文言文，如曹丕典論云：「蓋文章，經國之大業，不朽之盛事。年壽有時而盡，榮樂止乎其身，二者必至之常期，未若文章之無窮……」寫文章如此重要，豈可入門即讀左丁山，即是未學行，先學走，PK地上，固宜也。三合體專欄前輩，三蘇、韓中旋、楊八妹三者，皆熟讀古文，唐詩宋詞背誦如流，方以廣東話入文，左丁山難望其項背，跟韓公偷師，曾向楊八妹討教三招兩式，在此混飯吃，各方看官，體諒則個。
在中文大學畢業，有個好處，起碼識寫幾句中文，想當年在銀行做研究員，一位港大畢業之同事掉本英文小冊子落左丁山張枱，只講一句：「我地港大畢業嘅，唔多識中文，你係中大畢業，翻譯咗佢啦！」左丁山為之愕然，先至知道中大人在中環，如果中文唔掂會幾唔掂！譯咪譯囉，自己後來成為銀行之「中文專家」，升職幾快㖭！