前利物浦領隊賓尼迪斯（圖）離開咗年幾兩年，不過佢對紅軍真係有深厚感情，早排透過佢老婆嘅慈善基金組織，捐咗2,800鎊去希斯布祿家屬基金。希斯布祿球場慘劇喺1989年發生，呢個家屬基金嘅主要目的係要畀全世界知道呢宗慘劇發生嘅原因。賓尼迪斯以前捐過近10萬鎊去呢個基金，佢話：「我當利物浦係我屋企，呢度啲人對我同我屋企人都好尊重，而呢個基金對呢度嚟講亦好重要。」