鄭嘉穎、徐子珊、高鈞賢同張秀文等，噚日喺銅鑼灣出席商場宣傳活動，嘉穎攞咗視帝之後真係財源滾滾來，雖然身價高但工作依然未停過，佢話自己冇乜加價，仲話如果再加就怕冇人敢搵佢做嘢。
問嘉穎榮升無綫吸金王，有冇計過進帳幾多？佢話：「冇計呢啲，自己唔會同人比較，人比人比死人，目前都係做好自己工作。」嘉穎又希望明年可以置業，不過要睇到時嘅樓市情況先決定喎。嘉穎事業得意，但講到感情就話隨緣，佢話好彩屋企人冇催佢，所以都係專心工作先。
子珊改裙免暴露
同樣工作不斷嘅子珊，噚日都露咗少少事業線，佢話：「大時大節嘛！今日又唔係太凍，原本條裙仲性感，我已經縫埋咗少少。」另外，近期扮電影《那些年，我們一起追的女孩》男女主角嘅高鈞賢同張秀文，噚日着校服出現，佢哋話好開心，雖然係冒牌，但都為佢哋帶嚟唔少工作機會。