來到英超快車第3回，強隊連環失分相信已累得部份波友傷痕纍纍，賽程太密，最失望是大時大節比賽可觀性比期望低，弱隊作客冇期望只求1分，死守場面連環發放；不過正因賽程極密，強隊軍容較盛，在車輪戰會更着數，還原基本步，今周捧曼聯同阿仙奴，望11年帶笑過去。
利物浦真的利乜浦，阿仙奴圍攻反被狼戲，連同車仔及曼城失熱W，第2輪其中4場重要戲碼「全和全細」；早不期望正牌莊家在今輪肯調冷這類公眾熱門的賠率，賭波差唔多已成一星期7天嘅長期戰鬥，不像賭馬一周兩賽去到尾幾場馬迷要追數，造就投注額狂飆。不少波友都已懂擅用注碼，睇住budget，肯有耐性平常心面對冷門頻爆的場面；今日英超不順，明早還有澳職，做人也應如此，積極從錯誤中學習，睇錯咗學精了，等好事來，亂衝無謂。
上回只因睇錯利物浦做重心，就算貼中車仔「細」同修咸頓W，也令整份貼士泡湯，不是賭氣，但小弟不會放過追殺上次逼和利記嘅布力般。後者今次作客曼聯，有10個剛果中堅基斯杜化森巴都冇用，因對手主力盡出，誓賀費Sir70歲大壽、球會上榜首；最重要前線有上回刻意休息嘅朗尼同韋碧克正選復出，紅魔應不會像上次利記般盲目將波吊入中路，讓中鋒安祖卡路爾硬撼森巴毫無作用。賽前布力般領隊卻恩感激費Sir致電力撐，似差點哭出淚來，其實老狐狸擅出口術，又不是印度老闆開口撐，落到場便知敵人對你有幾殘酷。
另一隊上仗出口術成功嘅係昆士柏流浪，上回賽前資深領隊禾諾克大談球隊開季不及另外兩支升班馬，結果被一致看淡下，作客對史雲斯下半場用真力幾乎反勝；但踢法3支升班馬中最單調，仲靠希古臣衝門冇幾多料。同布力般一樣，連續作客今回去到受傷了嘅阿仙奴，難踢。阿仙奴人腳有用、可用不多，惟望有活力嘅艾朗藍斯同禾仔打番正選，尹佩斯搵番對射門鞋。
波場馬場老狐狸不知凡幾，如本地馬壇王者大摩，剛戰不在港才下令出擊起個半冷尾口孖寶，明天元旦大賽日，適逢勁敵蔡約翰多明星馬登場，提防大樹遮蔭，大摩又嚟料。
下次見報日期（4/1）
蘋果波神
今日重心推介
熱選
曼聯勝[-2]（1.95）
冷選
阿仙奴勝3:1（9.5）、4:1（15）