嚟緊2012世界末日？開開心心過埋呢個大除夕，就開始「末日倒數」；有無諗過點死法？做人有啲大志，唔好理街口會打白鴿轉嘅綠Van，亦唔好理外傭、蝗禍會踩冧香港；UFO外星人、瑪雅末日論，感覺幾「大時代」！有人話2012地球再發育，亦有觀點話地球大爆炸，今日出定「排位表」，自己揀條路喇！
記者：張文蕙、溫曉嵐
瑪雅末日預言
可信度：★★★★囗
得救指數：★★★
撐!
李燦榮：瑪雅科技唔講得笑
瑪雅曆分為長曆、卓爾金曆同哈布曆，三種曆法互相同步配合；以5125.37年為循環周期，瑪雅曆法稱之太陽紀！單論哈布曆，太陽年一年為365.2420日，比現代天文測算365.2422誤差為5,000年約一天，在沒有外來助力下，他們的智慧實太不可思議！
瑪雅人曆法如此精準，但偏偏到2012年12月21日終止，內裏必有所指，恐怕是大變之局！例如太陽、地球和銀河系中心的人馬座，出現在同一線上，於是有人相信，地球磁場會易轉。當中一派科學理論就指現代蜜蜂數量減少，可能同地球磁場改變有關。但我本人不大相信世界會滅絕，反而是有某種大變多一點，所以人類最終要如何自救，就是學習如何迎合一個新紀元的開始。
撐!
張繼聰：我哋要Upgrade做外星人
瑪雅預言並非世界末日，而係人類將進入第五維度新時代！維度是硬件，我們身處三維空間，時間就是第四維度；靈魂是軟件，用密度表示，礦物是第一密度，動植物屬第二，人類屬第三，而外星文明或鬼神等屬第四、第五或更高密度。現在我們正身處第三密度尾聲，第三密度周期約2萬5千年，周期結束，便會向「第四密度」進化。地球能否升呢，取決於人的覺悟；上次第三密度周期結束是2.5萬年前的亞特蘭提斯，但那時地球沒有進入第四密度。
2012年升班！就如進入國際學校見到外國人，即人類有機會與更高密度外星文明接軌。若然繼續留班，就會留在第三密度繼續輪迴。醒覺意思就是認識宇宙真相，一字記之曰：愛，夠愛就可以升呢！根據《一的法則》，修行方法有兩種：每天為別人做51%好事，或自私到底、做足95%自私事，兩者皆可以讓我們進入正、負的第五維度。
UFO襲地球
可信度：★★★★
得救指數：★★★
撐!
飛碟學會會長阿Moon：外星人一早嚟咗啦！
近年UFO目擊個案奇多，又有越嚟越多網民留言，聲稱聽到奇怪號角聲，夏韶聲更指明年冬至會有三艘巨型太空船降落地球表面！
如果問UFO會否襲地球？我覺得要襲的話，一早就襲咗啦！其實佢哋老早已經嚟咗！只係畀政府封鎖消息！我相信外星人已經住響人類當中，滲入科學家等圈子，暗中監視人類，唔俾各地政府製造一啲超過地球可以承受嘅科技同武器。
不過外星人都有分好、壞之分，壞嘅跟人類同樣心懷不軌，拿科技跟人類進行各種勾當；好嘅外星人則比壞嘅更有智慧，層次更高，佢哋曾向地球人發放訊息，但就遭政府封鎖消息，因此佢哋再不屑同人間組織打交道，轉而以精神層面同人類講話，例如進入人嘅夢境中。我認為好嘅外星人都希望地球人好，因此只要我哋肯求教、一心向善，佢哋會衡量仲有幾多人係值得救，再教我哋點樣喺亂世中自救。
破壞世界陰謀論
可信度：★★★★
得救指數：★★★★
撐!
小克：所有陰謀係錢作怪
我相信陰謀論講法，同美國自私地對經濟上存在貪妄有關！其中最著名係911陰謀論，呢個災難可能係美國政治陰謀、疑點重重！例如五角大廈嘅崩口直徑同飛機直徑完全唔夾、樓宇倒下嘅情況同飛機撞下原理不一；事件發生後，美國政府即刻公佈劫機者名單，無耐就話要剷除塔利班、捉拉登、同阿富汗宣戰，再搵大殺傷力武器為由攻打伊拉克！我認為根本就係美國自導自演、製造敵人，一是方便成為維護和平角色、保持國際地位，二是對軍火事業更有利，講到尾，又係為咗錢。仲有其他陰謀論！金融危機同世界新秩序，根本係一種「優生學」！將世界人口減少，剩下有頭腦、又有錢嘅優良人口。
佛家對世界末日的理論，就是世界本為一體，每個人嘅思想都會引起世界波動；據浮空法師指，人類負能量，例如憤怒、貪妄等都會引發不同天災，所以人先至係令災難發生嘅兇手。我相信原本應該發生咗嘅世界末日已經過去！因為越嚟越多人醒覺，例如對大財團不公平壟斷作出反抗、對環保更加重視，全部都係正能量發放，保住咗地球條命！
世界末日呢個題材，唔係要迷惑大家，而係一個警惕，試諗吓！全球只要熱多2度就完蛋嘅時候，再唔以大愛去過生活，人類玩完嘅日子唔遠喇！
第三次世界大戰
可信度：★★
得救指數：★★★
唔撐!
李丞責：WWIII？等100年啦！
出年九星連珠的天文現象，代表重新及更新，喺政治上會有新王者誕生！另外，因為太陽太接近地球，人嘅情緒會受影響而變得暴烈，紛爭自然多，加上龍年為壬辰年，龍代表帝王，暗示會有政界人物引退，或管治上出現危機，政局不穩。不過發生第三次世界大戰的機會唔會太大，因為「5運」先至係代表戰亂，按20年轉一運計算，大戰至少要等多100年才會發生。
撐!
陶傑：神經獨裁者係導火線
人類受天體影響，變得情緒不穩嘅機會甚大，特別係擁有核武或疑似擁有核武國家、權力不受制約嘅獨裁者，因為缺乏安全感，神經易受觸動，容易有抑鬱症或精神問題，只要一兩個統治者發神經，就有機會開火打仗！
我預言2012係多事之秋：歐元下跌，世界經濟不景，中國出口亦受波及，加上俄羅斯、台灣分別有選舉，美國總統換屆，種種改變有如多架大貨車喺迴旋處換方向，有啲車要切線，有啲又唔打燈，好易撞！
地球磁場易轉
可信度：★★
得救指數：★★
唔撐!
地理生物學專家周博文：地磁消失以萬年計！
有傳天體和物理學家研究表示，地球與太陽在2012年都會進入一個磁極顛倒的過程，引發更多火山爆發、地震、山崩海嘯等末世災難！
地磁格（HartmannLine）消失，是地質生物學創立幾千年以來首次出現嘅異像！地球表面存在着一格格看不到的地磁格，每格面積約2米×2.5米，它們隨着地球轉動，產生輻射線，但近一兩年有專家發現呢啲地磁格有異常移動情況，有時更無故消失。科學家暫時仍未找出原因，但這卻暗示了將有事情發生！我認同磁場確有消失的一天，但所需時間以萬年計算，不是你我有生之年會發生嘅事，更遑論2012。
聖經末日論
可信度：★★
得救指數：★★
唔撐!
露芙：信主得救！
身為基督徒嘅我，認為世界末日就如聖經所說：神會再次降臨！聖經上曾預言有4馬及4怪物，有聖經預言家發現今已到達第三隻黑色的馬及第三隻怪物（豹有四翼的）。黑馬意思指政治問題，如現在的石油問題，豹有四翼意指非洲及分界后的希臘、土耳其、利比亞及伊朗，暗示再興起的國家，而這也暗指基督會再來的日子近了。但我本人認為絕不會在出年12月21日發生，而人類自救方法只有信主。
唔撐!
李燦榮：《啟示錄》非完全不可信
《啟示錄》的確有提及過規模空前的火災、地震、冰雹、異常高溫、水變質害死人等等，而久年也真的有所應驗，不過我認為內容無講過邊年邊日發生，又無講清楚邊個人嘅預言，認為證據未夠有力！
不過大家唔好當佢完全不可信！因為較堅嘅證據，反而係香港探險隊喺土耳其雪山發現懷疑挪亞方舟遺蹟一事！探索隊當時發現一個「巨型木建築」，裏面分為多個類似房間的間隔，部份建築更可推算為圈養動物的木欄。據了解，木材樣本經「碳十四年」方法（鑑定古物年代的方法）化驗後證實它確有4800年歷史。
末日走難必需品
a.香港攀山訓練中心(27706602)
b.英昌露營用品專門店(23851255)