一夜暴富嘅球會除咗曼城，仲有今季由嚟自卡塔爾財團入主嘅巴黎聖日耳門。季前已經大事增兵嘅聖日耳門，喺歇冬前只係得些微優勢坐喺法甲榜首位置，老闆似乎唔多收貨。據講球會斟安察洛堤接手執教已經七七八八，亦都準備好到1月球員轉會市場重開之後，簽碧咸、卡卡、柏圖同馬隆達等星級球員，令巴黎更加星光燦爛。
聖日耳門喺季前大事增兵，包括以破法甲轉會費紀錄簽阿根廷中場柏斯托尼，不過超班陣容並唔代表有壓倒性優勢，踢咗半季家只係喺榜首領先蒙彼利埃3分。聯賽冇預期咁可以大拋離，加埋喺歐霸盃出局，聖日耳門教練甘巴利尼帥位已經凍過水，據講球會體育總監李安納度已經搵咗佢老友安察洛堤做接任人選。
柏圖傳離AC入「聖」
肥安喺今季前畀車路士炒魷，唞咗半年都係時候出山。據悉聖日耳門開出一份兩年半合約，年薪係破法甲教練紀錄嘅600萬歐元（約6,017萬港元）。有新主帥自然會有新班底，最近傳出嘅收購人選，唔少都係喺AC米蘭同肥安合作過，包括碧咸、柏圖同埋卡卡。最近一直都盛傳巴黎聖日耳門會開出周薪20萬歐元（約200萬港元）嘅年半合約畀碧咸，睇怕都係好事近。至於卡卡雖然今季喺皇馬表現有啲起色，不過可以同恩師安察洛堤再合作，對佢嚟講絕對係吸引。
AC女婿柏圖早兩日出言頂撞教練艾基利，話同佢冇乜交流。睇嚟除咗因為有老闆個女撐腰，有聖日耳門呢條後路都係主要原因。周三意大利報紙爆料，話柏圖嘅經理人貝洛斯去咗巴黎搵李安納度密斟，當事人話係朋友聚舊，不過實情係乜嘢一回事都好明顯。
馬隆達想落「車」返法甲
除咗新舊AC米蘭球員之外，今季喺車路士冇乜波踢嘅馬隆達，都公開話想走人返法國。話晒曾經都係法甲最佳球員，對於聖日耳門嚟講都有一定吸引力。反正錢係多的是，擸埋都冇蝕底，但求將巴黎聖日耳門打造到更加金碧輝煌。