蘋機會：iPhone小龍女　Pro影HDR小反差

談專業攝影，早非男士們獨享玩意。像揹起十幾磅重攝影器材四圍獵影嘅女生，已越見普遍；近年仲因為iPhone熱潮，加埋facebook流行分享照片，令「小龍女」人數激增！但單靠呢部電話，點先可拍攝出談得上有主題嘅「好作品」？不如等新進女攝影師Rita過大家幾招。

記者：陳國輝
攝影：伍慶泉

三大秘技

靚女Rita係第五屆iPhone攝影國際大賞嘅大會顧問，佢對黑白照情有獨鍾，並喜歡搜集各類如LeicaM6、Hasselblad500C/M及OlympusOM-1等經典菲林機之外，估唔到佢連玩iPhone攝影都咁有心得：「其實學影相唔一定買靚相機，只要掌握到基本技巧，就算玩手機一樣可以勁專業！」
佢教路，當大家拍攝風景相，謹記留意光線嘅位置，如果你想保留清晰嘅背景，同時又要清楚見到人像，通常會開啟iPhone內置嘅HDR功能，可減低光暗位嘅反差問題，令相片色彩更均勻；至於特別鍾意玩自拍嘅女仔，Rita就建議最好關閉快門音效，一來唔怕騷擾到其他人，二來亦方便番自己；最後，好多女生鍾意拍攝美味嘅食物，佢話作近距離拍攝嗰陣，最緊要打開App內的微距功能，唔驚主體失焦，更可以突出主體嘅美感。

■開啟HDR功能，可將光暗反差情況減至最輕。

■當你喺鬧市影人或者玩Snap，Rita建議不妨將快門聲關閉。

■影花或影食物，記得開啟App微距功能，否則主體好易失焦。

愛相片有電影感

如果以上竅門你已經掌握到，Rita仲有兩個心水影相App推介，提升攝影玩味！其中一隻就係《Instagram》。「時下好多專業相機都加入特效濾鏡，而呢款App提供嘅種類更多，例如X-proII、Earlybird、Lomo-fi、Sutro、Toaster，將移軸、景深等效果統統玩齊！」咁都未算，影完相之後，你仲可以即時分享到facebook、twitter、Flickr等社交平台，玩盡手機優勢，就連專業相機都無辦法做到。
另一隻韓國App《PuddingCamera》也屬於Rita至愛！「呢款App雖然無咁多Filter，但勝在能模擬出唔同鏡頭效果，例如針孔、魚眼又或者Lomo等，但自己就比較鍾意16比9效果，極富電影感。」覺得內置分唇已經玩到悶悶哋，不妨單撈各類影相Apps逐一試玩。