無綫劇橋段十年如一日，但穿崩鏡頭就鑊鑊新鮮，近期仲穿崩穿得好密，馮仁昭開始懷疑無綫係咪特登，等啲觀眾可以捉下錯處冇咁悶。
無綫民初劇《我的如意狼君》星期一晚嗰集，講陳山聰喺樓梯推跌演佢老婆嘅葉翠翠，佢就同劉俐（藍莓）演嘅情婦坐人力車出街，點知條路竟然出現咗全日唔畀停車嘅雙黃線，旁邊仲有啲現代鐵欄杆，雖然鏡頭得一秒，但眼利嘅網民一眼就認到。
早兩日《我》劇已經俾人發現咗姚子羚飲緊支有BarCode嘅紅酒，點知隔兩日佢哋又穿越時空去咗香港某條街坐人力車，不過都未夠之前《萬凰之王》喺皇宮出現樽裝烏龍茶咁離奇。
天華玩死Niki
另外，《我》劇女主角周麗淇（Niki）噚日去咗商台接受訪問，有消息話舊愛鄭嘉穎想同佢翻撻，但俾佘詩曼阻止，Niki話：「可唔可以唔答，點答都死，翻撻呢個字即係話有一齊過，咁敏感嘅問題我真係唔答。」問佢喺梁靖琪婚禮度係咪俾阿佘怒睥？佢話：「我真係唔知點解咁多呢啲新聞。」
Niki話自己單身，所以專心工作，但同場嘅謝天華就加多腳問佢：「你拍拖拍成點，都係同嗰個㗎啦？」
