異形系列電影，唔少人都由細睇到大，由未來太空打到回地球，上山下海，偏偏就係未睇過西部牛仔打異形。《天煞西部反擊戰》上畫前宣傳十足，點知無聲無息快快落畫，唔少人都錯過咗。雖然Blu-ray聲畫表現平平，但勝在有型男索女，年尾無乜片煲，頂住癮先喇！
記者：韓繼聰
部份攝影：陳盛臣
鑽石陣容晒冷
一齣電影要吸引人，卡士總係頭號因素，起初俾呢齣《天煞西部反擊戰》吸引都係因為佢嘅鑽石陣容。型絕影壇嘅007型男丹尼爾基克；實力老戲骨褔伯夏里遜福；更加唔少得絕對吸引男性嘅索女OliviaWilde，幕前已經夠晒精采。幕後更有史匹堡監製，《鐵甲奇俠》導演JonFavreau執導，仲唔係鑽石級？當然，新穎題材亦非常吸引，西部牛仔搭科幻異形，兩大類型片Crossover，過癮非常！原來電影改編自同名漫畫，當今荷李活電影果然係漫畫大晒。講番齣戲，開場一輪西部式格鬥槍戰，大晒主角型味之餘，亦極具西部片冷峻風格。到後期同異形周旋肉搏亦夠精采，而沙漠騎馬追UFO更係必睇一幕，過癮刺激，娛樂性豐富！
Bonus欠驚喜
台前幕後咁勁，故事又吸引，理應係齣不可多得嘅好戲，可惜Blu-ray質素就認真普普通通。「整隻Blu-ray的聲畫都只能用一個『平』字形容。」影音專家李柏權說道。先說音效，異形片當然少不了大大小小的爆炸場面，雖然低音爆炸尚算震撼強烈，但可惜動態表現一般，觀眾感受會無咁深入。不過中段異形來襲，以及男主角每次發動左手武器，亦有震入心嘅感覺，音響整體表現算係中規中矩。再說畫質，李生就話：「整齣戲的對比度不足，主角們的面口都偏暗，但感覺上是製作時出現的問題。」既然是製作問題，對Blu-ray來說，亦可說是非戰之罪。另外，Bonus亦無乜驚喜，導演演員訪談加製作特輯，基本嘢，可以一睇。臨近年尾新碟唔多，科幻大片更係欠奉。如果之前喺戲院錯過咗正場，憑着佢嘅新意、娛樂性同卡士，呢隻Blu-ray亦算是可睇之作。
Blu-ray必睇位
