今年港股表現麻麻，但新股仍前仆後繼上市，今日招股嘅滙力資源（1303）雖然細細粒，但就成功出位，令華華記得佢，靠嘅唔係往績，而係主席王大勇張限量版「閃卡」！
滙力主席：朋友賀禮
噚日華華去滙力嘅新股發佈會同王總交換卡片，佢張卡片認真唔嘢小，採用類似智能身份證嘅物料製造，質地堅硬，除咗有王總嘅嘜頭，仲有雷射閃光防偽特徵，望多幾吓，又幾似公司職員證喎！
滙力資源從事金屬採礦，唔係印卡片，更加唔係做防偽證件，王總解釋，呢款「閃卡」係一個朋友為咗恭賀滙力上市，特登造嚟送畀佢，全球只得50張，係限量珍藏版，只係派畀記者，公司做路演時都只係派傳統卡片畀分析員。