阿里巴巴（1688）母公司阿里巴巴集團，要回購番喺雅虎手上嘅集團股份傳聞，已經聽過無數次，甚至有傳阿里巴巴創辦人馬雲有興趣收購埋雅虎㖭！最新版本係，如果雅虎唔肯出售手上嘅阿里巴巴，馬雲就諗住嚟鋪勁，收購雅虎全部股權！
公關幫開高盛輝瑞
今次馬雲仲請咗一家美國公關公司幫手，呢間DubersteinGroup來頭唔細，由曾擔任美國前總統列根白宮幕僚長嘅KennethDuberstein掌舵，手上客仔包括高盛同輝瑞，齋睇客仔名單都夠照。
喺現今資訊爆炸嘅年代，有一個好嘅公關好重要，本地例子當然係我哋嘅特首候選人唐英年，轉咗公關後，民望急升話咁易。
過去中國公司要收購美國企業，尤其敏感性較高嘅企業，好多時都撞板。如果有間具江湖地位嘅公關幫吓手，相信馬雲會冇咁頭痕。