近排有唔少內地股民輸身家嘅哀歌喺網上瘋傳，可能A股近期跌得實在太慘烈，大家輸咗血汗錢嘅悲憤無從抒發，惟有訴諸文字。除咗之前嘅小學生作文〈爸，你不要再去買股票了〉，另一篇被瘋傳嘅文章就係〈美女炒股進了瘋人院〉。
三間美容院葬身期指
文章講到，有位美女07年開始買A股，三個月就由50萬人仔（下同）贏到185萬，賺咗2.7倍。不過08年開始，就由500萬輸到乾塘。話說佢原本係三間美容院嘅老闆娘，最後要賣晒啲美容院，葬身期指市場，兼輸到入精神病院，最近先放番出嚟。
其實一鋪清袋嘅，又點止呢位美女，香港都有位大叔，買咗隻股票，股價跌到差唔多變零，同樣俾人話佢一鋪清袋，但佢家仲可以企出嚟選特首㖭。