國家隊教練揀蟀，多數都會揀番啲有名氣，或者喺頂級聯賽搵食嘅球員，貪有保證呀嘛。不過意大利教練柏蘭迪利，最近就出人意表咁，打算徵召意乙古比奧嘅後衞法利拿（圖）入伍，同國家隊操練3日。原來法利拿之前拒絕有賭博公司用20萬歐元（約203萬港元）賄賂佢嘅引誘，冇喺意大利盃對切塞納嗰場打假波。柏蘭迪利大讚佢嘅行為，所以先揀佢入隊。