距離特首選舉嘅日子越嚟越近，唐英年、梁振英、何俊仁同馮檢基四位參選人見報率越嚟越高，但多數喺港聞版出現，好多財經界人士都埋怨，幾位參選人好少觸及有關金融業嘅話題。有見及此，金融服務界18位選委特登邀請幾位參選人同場較量。
唐梁先發言 泛民殿後
華華收到風，唐英年同梁振英分別喺聖誕節假期前同噚日，應承下個月16號去港交所，出席專為金融界別而設嘅選舉活動，講吓金融業政綱。金融界呢排最關注港交所（388）明年3月推行第二階段延長交易時段，同埋會唔會改佣金兩級制，呢啲題目好難吹，希望各位做吓功課，以免到時出醜。
根據初步安排，幾位參選人分段時間發言，唐唐下午5點至6點講先，之後輪到梁振英，最後嗰個時段就留番畀泛民其中一位參選人，不過就未安排到幾位一齊激辯，埋身肉搏欠奉！
提提大家，港交所個場只容納到300至400人，暫時預計除咗18位選委、立法會議員詹培忠、七大經紀業組織理事約70人，剩低200至300個位，如果到時人多，可能要先到先得，有興趣旁聽就要行快步嘞！
李華華
mailto:[email protected]