「亨利」出道至今曾踢過幾間球會，那些年、那些人他都難以忘記……
1）花花（02-03）招重文
「係文仔一手帶我入甲組，如果冇佢，我冇今日；當年我唔係踢甲組出身，又冇踢過青年軍，只喺有個『元朗亨利』朵，佢特登落去睇我踢小型球，之後就入咗花花。
2）流浪（03-04）李炳雄
「佢令我知道咩叫做體能，嗰陣好似軍訓咁，跑沙灘跑足一個鐘，再跳繩10分鐘，再練無形凳，練到雙腳震過貓王。」
3）南華（04-08）
黃文偉（圖）、米路、羅傑承
「偉哥影響我好深，佢對球隊嘅熱誠風雨不改，有時我自己早上加操，佢又陪我一齊健身，令到球隊好有凝聚力；另一個係米路，佢令我被人認同係後備殺手，否則我嘅足球事業唔會發展到家；仲有羅傑承，佢搞起個球市，令到好多球員搵到食。」
4）天水圍飛馬（08-09）
伊達（南華借用）
「我未試過同一個外援球員咁夾，大家唔同language，但落到場唔使講嘢，大家知道走去邊，喺佢身上亦學到好多技術。」
5）傑志（09-11）鄭兆聰
「佢時常點醒我，令我對足球有另一種睇法；佢睇到好多細微嘢，亦講得出嚟，令我踢得更通。」
6）晨曦（11-現在）
列卡度（圖）、招重文
「唔係列卡度對我有信心，我未必有咁多正選踢；重遇文仔，冇特別待遇，係比其他人練得更『甘』，佢哋兩個帶我去到第一個高峯。」
