通常明星卡士勁嘅電影都好賣座，英皇集團旗下英皇電影深明此道，最近簽咗葛優，諗住靠呢位影帝級人馬吸金。不過，未必人人都鍾意簽巨星，美亞娛樂（391）董事總經理唐慶枝（圖）形容，拍電影好似做廚師，「每個人口味唔同，好似美亞唔會特登為明星包裝一套戲，而係睇成個project去揀明星。」直接講即係睇餸食飯，有幾多投資，就用乜嘢級數演員。
唐慶枝又話，由梁朝偉同周迅主演、啱啱煞科嘅《聽風者》，會喺明年暑期上畫，套戲嘅網絡版權俾各電影網站爭相認購，「原本開價1000萬（人民幣．下同），估唔到反應咁好，價錢已超過呢個目標，仲好大機會賣畀中央電視六台（電影網）！」佢話舊年內地票房收6億幾嘅《讓子彈飛》，網絡版權得500萬，證明網絡版權呢條新財路，增長速度「非常得人驚」！