左丁山上周二喺《蘋果》嘅專欄，大讚嗰班小圈子選委會選民的優越性，「人數雖然比較少，但教育程度屬全港最好嗰一批」，唔似普羅大眾咁容易俾梁振英的能言善道打動，仲質疑大眾「對梁嘅深層次認識有幾多」，所以即使梁在民調中遙遙領先，「但在香港精英之中，梁生嘅支持率最低」。言下之意，佢明顯係話普羅市民好容易俾梁嘅口才呃到，只有精英才眼睛雪亮。
左丁山咁講，真係偏離民主之路甚遠！咁佢點會覺得一個普通維園阿伯手中的一票，與那些受高等教育的精英那一票是一樣的呢？如果左丁山對公眾嘅眼光咁冇信心，咁精英主義，仲贊唔贊成一人一票選特首呢？
沙膽虹唔敢話自己識政治，但起碼知道，如果決心支持民主，支持一人一票公平公正嘅直選，既要尊重人的權利，認同每個人手中嘅一票，都是平等的；亦要相信人的眼光，如果覺得普羅大眾不及那些所謂精英，那豈非逐步又走回專制主義？在民主選舉中，公眾最後選咗個阿豬阿狼又好，共產黨民主黨都好，大家like唔like都好，都要尊重和接受。最多下一屆投給別人把他換掉！
階級就是靠左丁山這類想法的人維持的，如果香港多幾個好似左丁山咁諗法嘅人，小圈子將更難消失！真悲哀！
沙膽虹