電視劇《天與地》帶旺夾Band熱，旺角街頭早前都有位「少年黑仔」結他手自彈自唱，但最終竟然俾三名MK仔欺凌，當場整爛佢個結他，被人拍咗短片上載YouTube，叫做《可恥!旺角街頭表演者被MK仔欺凌》，網民睇完人人喊打，仲自發「追緝令」，誓要揪出三個小惡霸，為「少年黑仔」討回公道，但當網民「尋人」之際，竟然發現短片只係一套實驗作，激氣地問使唔使玩到咁大？
造假故事發生喺旺角西洋菜南街同豉油街之間，三名MK夜青一腳踢開寒夜賣唱少年嘅結他，鬧完一輪仲拎起結他打向地，網民睇到眼火爆，群起聲討兼緝兇，嚇到上載短片嘅製作人自動投案，上載名為《對「可恥！旺角街頭表演者被街童欺凌」的回應》嘅片段致歉。
上載人：想表達愛與和平
自稱「PEACEJPL001」嘅上載人話佢哋只係做緊一齣實驗創作騷，想以寫實手法表達愛與和平，喚醒市民關心身邊嘅人；冇諗到事情最終會失控，為咗保護三名演員嘅人身安全，已經即刻叫停創作，仲會檢討自己嘅表達手法。
有網民大鬧造假片好得人驚（ http://www.iamguitarplayer.com/forum.php?mod=viewthread&tid=20291）
，有人就質疑究竟係咪真係A貨先，咁大手筆打爛個結他？喺旺角樓上舖嘅重金屬Band友Edward就憤憤不平，唔理段片真假，話睇見個結他爛咗好鬼嬲，睇完條片亦只變成「憤怒鳥」，唔覺得有乜嘢愛與和平嘅訊息。佢仲試過喺葵涌工業區舉行天台音樂派對，點知警方接獲噪音投訴後連同反黑組衝上天台清場，所以好羨慕街頭音樂人自彈自唱，難怪咁同情「少年黑仔」嘅遭遇。
mailto:[email protected]