農曆新年未到，大馬糖王郭鶴年已經收到一對「大桔」！話說，2009年時糖王豪掟19億買咗喺新加坡上市、全球最大棕櫚油交易商豐益國際旗下嘅豐益中國1.6%股份，部署將豐益中國拎嚟香港上市。不過，事隔兩年，上市唔成，糖王將啲股份賣番畀豐益，作價仍然係19億銀。
19億一來一回蝕晒息
19億銀就咁放喺銀行收息，兩年都應該收唔少，家陣原銀奉還，得個桔！
至於糖王收到嘅另一個桔，就同佢旗下嘅香格里拉（069）有關。話說已經喺大連同瀋陽開咗酒店嘅香格里拉，年初時想喺遼寧開多間酒店，於是喺遼寧省營口市老邊區投咗塊地，仲畀咗2.7億人仔按金，當地政府亦都批出咗土地使用權成交確認書。不過，喺聖誕前夕，嘉里建設（683）同香格里拉發聯合公佈，話由於喺同一個城市已經有項目，經重新檢討後決定唔玩。
北韓變局 放棄瀋陽
變化咁大，唔知同北韓金正日啱啱駕崩有冇關係，皆因北韓同瀋陽咁近，北韓政局有變，心理上可能有影響。
乜嘢原因都好，最緊要可以攞番所有定金，即係搞完一輪，又係冇贏冇輸，得個桔！
不過，舊年市況咁波動，對於唔少人嚟講，輸少已經當贏，家陣糖王連環保住兩項投資嘅本錢，算執番身彩。
李華華
mailto:[email protected]