近期受欠薪同高管離職消息困擾嘅SOHO中國（410），最新傳聞係董事長潘石屹退隱，首席執行官張欣強勢入主。SOHO中國一向係夫妻檔，潘石屹同張欣人前人後一向恩愛（圖），但內地傳媒引述消息話，張欣近幾年改革公司，逼走跟開潘石屹嘅舊部屬，換咗批外籍管理人員，希望將SOHO品牌國際化。佢又將以前一直歸潘石屹管嘅銷售團隊精簡，意圖攻佔老公領土。
「從來沒有一言堂」
內地傳媒仲將上市公司同佢兩公婆嘅關係拉埋一齊講，話潘氏伉儷6年前已經出現婚姻危機，之後張欣就取代潘石屹走到台前。
對於咁大嘅指控，張欣即刻喺微博澄清，「16年來我們公司的管理風格沒有變化，我負責建築建設、工程、金融；老潘負責銷售、出租、推廣；公司所有重大決定都是在每周的管理會上磋商共同決定，從來沒有一言堂。」
張欣上個月俾英國《金融時報》選為2011年全球商界女性50強其中一位，可能因為樹大，所以招風呀！