聖誕已過，好快就會迎接農曆新年，今日已係辛卯年十二月初四，二十六日之後已係壬辰年年初一，故此已有長期讀者催促左丁山循例遵照往年習慣，寫下來年吉日吉時。
易學會會長傅沛基每年年末向朋友發佈來年預測，見諸報章，今年佢嘅朋友大方允許左丁山照樣寫番一個濃縮版，供大眾參考，以符傅會長惠益大眾之期望，協助各位趨吉避凶，既然如此，左丁山也就唔怕醜了。
（一）今年冬至（十二月二十二日）為閉日不是好日子。尾禡（一月九日）係定日，屬好日，通常舖頭東主甚為重視，多與所有夥計大吃大喝一餐，以酬謝夥計一年辛勞，是日黃昏五時至七時為凶時，傅會長建議在下午三至五時吃飯，若然不便，可改吃午飯（十一時至一時），唯豬人不宜。團年吉日可選一月二十二日年廿九執日，可惜是日吉時集中在上午，晚飯起碼要在七時後，鼠人不宜。
（二）壬辰年年初一（一月二十三日）適逢係破日，正是龍年開壞了頭，幾唔盞！其實年初一還是在辛卯年辛丑月之內，要到二月四日立春先至正式進入壬辰年，點知立春乙未日又是破日，加埋團年日，一連三個破日，是故傅會長話壬辰年會是很艱苦的一年。
年初一是破日，如何是好？傅會長建議年初二才開年，如一定要按例在年初一拜神，請選用吉時早上九時起，一時止。年初二為好日，可選用早上七至十一時拜神。
開工吉日左丁山早已應讀者要求，寫咗一篇。傅會長話年初四星期四係收日，非好日，如果一定要返工嘅話，最好在吉時開工，即早上九時至十一時，夜班在晚上七時後。有得揀的話（例如左丁山）就會選年初八星期一（一月三十日），開工吉時由凌晨一時至中午一時都係，可各適其適，但猴人（申年出生）不宜，商行老闆不如就俾夥計放多兩日假（年初四，初五）到初八先至開工啦，夥計一定開心，精神大振，在龍年困難的一年搏命多啲。