聖誕休市兩日，內地A股未見起色，滬綜指兩日跌近2%，環球股市未見大變動，港股假後開局似乎應該偏軟，但相信仍會有個別強勢股跑出。
晉佳觀察過往5年嘅數據，發現有一批股份年尾特別醒神，包括中國國航（753），過往5年最後一周平均回報達5.5%。
航空股面對頗多不利因素，包括高鐵分流、油價高企、貨運行業受出口歐美放緩打擊，同埋資金外流引發人民幣貶值預期等，足以令盈利由升轉跌。但事實上，航空股過去兩年業績都比市場預期好，原因係即使歐美經濟放緩，內地民航需求仍一直比預期為大。展望明年，全國民航工作會預計運輸總周轉量上升約一成，花旗亦預料明年航運需求增長10%至11%，睇嚟可以推動收入保持增長，彌補部份油價成本上升，同人仔貶值預期令滙兌收益減少嘅不利因素。
三大航空股中，8月至今以國航最弱，皆因國航貨運比重較高，佔總收入11%，近期貨運弱客運強嘅環境唔利佢；二、近期客貨運量增幅，跑輸南航（1055）同東航（670）；三、國航滙兌收益比例較高（上半年佔稅前盈利27%），受人民幣貶值預期影響較大，未來就算人民幣繼續升值，幅度都肯定大幅放緩。
母公司增持無寶不落
不過，國航最近公佈，母公司中航集團打算喺未來12個月內，繼續通過二級市場增持國航唔超過已發行股本2%（2.5億股），仲承諾只買不賣。
中航集團過去都有事先張揚增持國航，通常都喺股價偏低時出手。其中喺06年8月宣佈買入不超過6億A股，當時已經係股市中線低位，其後即升浪；08年9月金融海嘯期間，中航集團亦承諾增持3.5億股，結果港股亦喺10月尾見底。中航集團過往無寶不落嘅作風，的確可以提振市場信心。
論估值，國航預測2011年市賬率1.17倍，唔計海嘯期間，係上市以來低位。當然，出年年初歐債會唔會爆煲仲係未知之數，但12月底仲未反映危機爆發，配合母公司增持嘅消息，短炒理應安全，先睇6.20元嘅12月高位，終極目標價6.50元，跌穿母公司增持公告前嘅收市價5.55元就止蝕。
晉佳
本欄逢周一、三及五刊出