聖誕節普天同慶，吃喝玩樂係指定動作。唐牛都唔例外，拆禮物日去咗稻香（573）打邊爐，味道仲唔錯㖭，睇番公司嘅業績，原來一樣飲得杯落。
截至今年6月底，稻香中期賺1.25億銀，按年增長20%；毛利率亦增加1.3個百分點，去到16.7%。稻香喺中港嘅食肆分店超過80家，當中香港業務溢利微增1%至1.65億銀，內地業務則勁升84%至5130萬銀，成為增長引擎，同胞們對食物質素越趨重視，稻香嘅品牌效應，肯定令生意有增無減。為應付食材漲價，稻香年初喺內地收購咗豬場同埋雞場，而位於大埔及東莞嘅物流中心，亦令經營效率大大提高。
雖然中期業績未全面反映最低工資影響，但年度化市盈率較同業大家樂（341）有五成折讓，相對更值博。稻香上周五收報3元，年度化息率超過4厘，防守力高，但成交疏落，戰友可考慮喺2.80至2.90元耐心吸納，中線博破頂。
唐牛