喺大坑賣炭爐雞蛋仔30年嘅72歲小販吳旭輝（圖），今年4月被食環署人員拘捕時，引嚟70個見義勇為嘅街坊力撐，之後吳伯喺法庭承認無牌煮食，罰咗780蚊，之後吳伯失蹤幾個月，但佢今日中午將會重出江湖。
當代文化中心搞嘅MaD@西九，今日有個「自主地皮」活動，100檔2米乘1米嘅小攤檔賣本地原產，吳伯獲邀主理其中一檔。噚日八方探過吳伯，見佢做緊準備，佢話：「聽日用電爐整雞蛋仔，唔用炭爐啦，木頭車搬唔到過海。」
吳伯早前被揭一家五口攞綜援但佢賣雞蛋仔賺錢。吳伯話，已向社署申報，天氣凍都會賣幾個鐘雞蛋仔，「冇錢買餸啊！」