拆禮物日有英超，樓上有大名鼎鼎列納，樓下小弟當然硬着頭皮照「饗」讀者，也證此地依舊欣欣向榮，風雪罷工也不改，擁躉們永遠有奇想。
曼聯及阿仙奴──不論車仔或係曼城崛起，有費Sir同雲格在，永遠係天煞嘅死敵，大家同是傷兵成籮，但一隊冇晒中堅，一隊冇晒閘，真係襯到絕！今年餘下兩場又咁啱只對魚腩，曼聯迎韋根及布力般；阿仙奴主場對狼隊同昆士柏，6分穩拿；不過今晚曼聯開到[-2]，唞多日嘅阿奴開「主勝」穩陣啲。
車仔──近戰兩連和，被曼城拋離11分，唔好以為泰利上仗完場前勇救熱刺必入球，仲係球會救世主；查實官非纏身，車仔已準備成億簽保頓中堅加利卡希爾救駕，今年餘下兩仗對富咸同維拉都唔易食，尤其今晚早場對剛「受傷」的富咸，波亞斯上季喺波圖家已放緊冬假，凍冰冰，成場踎喺度，睇住隊波攻唔入，真係一啲都唔過癮。
曼城──賽程列強中最糟，個個腰纏萬貫，但佳節流流，去完西布朗再北上新特蘭，小心今年臨尾香，保唔住個2011年榜首嘅虛銜。
利物浦──放到最後唔代表最流，何況紅軍從來與小弟有賭緣，今天迎包尾布力般，趁阿蘇仲未放長假，真係要嗱嗱臨盡情發炮，送對手領隊卻恩一個大信封，咁嘅人腳，對住弱旅，真係不應再做利X浦。下次見報（31/12）
蘋果波神
今日重心推介
熱選
利物浦勝[-1]（1.58）
冷選
車路士細（2.15）