八方日前報道，朱凱迪冬至榮升做老竇，不啻係社運界一樁喜事。但朱爸爸開心湊女之餘，有樣嘢煩緊，就係律政司追訟費呢件事。
07年朱凱迪同何來申請司法覆核，阻止政府破壞皇后碼頭，亦獲得法援，但最終敗訴。09年律政司追討佢哋27萬，話呢筆錢係法援批出前六日嘅訟費，法援唔包。佢哋兩個負擔唔起，而律政司亦有酌情豁免訟費嘅先例，因此過去兩年一直同律政司傾，但律政司唔接受，今年中仲交法庭評定訟費增至29萬，另加8%至10%年息，最近仲威脅要申請兩人破產。
為咗唔想利叠利，本土行動已由一成員墊支29萬畀律政司，近日再發起網上籌款，希望還債。朱凱迪開咗個恒生戶口（348-417239-668，用戶名ChuHoiDickEddie）做籌旗專戶，到噚日籌到萬八蚊。本土行動話，超過299931.9元時戶口會取消；若取消戶口時存款超過呢個數，餘款捐畀民陣。