政府上星期委任68位區議員，趕得及成為特區政府2011年「十大德政」。呢班食免費政治午餐嘅委任區議員個個「戰績彪炳」──遲到早退、出席率奇低甚至落敗過，但點都唔及民政事務局局長曾德成咁勁，膽敢厚住面皮話「呢啲唔係事實」，仲惡形惡相兇記者：「你貴姓呀？」
曾德成噚日出席女童軍一個活動後，被問到點解會委任輸咗區議會選舉嘅人做委任區議員，佢避重就輕話今屆冇咁嘅委任喎；八方當然知啦，但政府今次委任嘅議員中，唔少都係07年區議會選舉嘅建制派敗將囉。點知曾德成死撐委任區議員個個有心服務社區，出席率低嘅報道唔係事實，至於庫房每屆要為呢班食免費政治午餐嘅議員使兩億，曾德成竟然反問記者：「點解你會叫做浪費呀？」護航護到出晒面，政府搵佢做局長真係啱晒。