下屆特首選舉暫時有四個候選人爭入閘，小圈子選舉講到尾都係阿爺揸弗，呢排啲參選人所謂落區接觸市民嘅活動，其實都係做吓騷。不過，四個參選人去到邊實有傳媒追訪，連帶佢哋出席嘅活動都有曝光機會，好似亞洲遊戲展嘅主辦單位就醒，分別邀請豬、狼同泛民兩代表去會場參觀。唐唐前日去完，噚日馮檢基又去，家何俊仁仲未覆大會去唔去，但CY就話冇時間，唔通費事畀人借佢宣傳？
玩咗幾次都係零分
唐唐前日無啦啦提早到場，去到現場又鬼鬼祟祟左閃右避，相對作為跑馬仔大冷門嘅馮檢基就冇乜壓力。阿基隻右手有舊患，家要用個套托住隻手，但噚日照樣同班老人家上台打機。但係佢似乎對打機唔多在行，玩咗幾次都係零分。
會場內有個畀廣大市民洩民憤嘅攤位，係個「足球九宮格」同「射橡筋槍」，擺滿晒政府班高官同近期同全民為敵嘅「中癲」任射。阿基唔似唐唐兜路唔敢玩，仲擺明挑釁競選對手，一埋位擺定個波就話：「我梗係射唐唐啦。」好可惜，射咗七八腳，都冇腳射中唐唐個框，阿基都算腳頭無靈。腳唔得試吓用手，拎起把橡筋槍再射過，今次目標瞄準煲呔，阿基認真到伏埋落張枱校炮，點知眼界都唔準，又係射極都射唔低個靶，點搞呀？
玩遊戲唔係阿基專長，都係講吓參觀完遊戲展有乜體會啦。阿基就話當選特首嘅話，會喺6,000幾億儲備入面，撥500億搞個支持新產業嘅發展基金，當中包括設計遊戲嘅創意產業。
阿基仲話，特區政府向市民每人派6,000蚊都用咗幾百億，用500億支持所謂六大產業，等香港唔使只係有地產同金融，一啲都唔算多。講係咁講，弊在要你做得成特首先可以實踐呢，喺小圈子選舉制度下，個機會率低過八方中金多寶呀。
mailto:[email protected]