仲有幾日就到2012年，新一年新開始，你屋企準備咗日曆未？係呀！係日曆，而唔係月曆。傳統要逐日逐頁撕嗰隻，你屋企仲有無用緊？
記者：陳家蕊
攝影：楊錦文
Model：Ruby
場地提供：G.O.D
舊時人 日曆即係通勝！
據出版三十多年傳統日曆的萬里行表示，從前人看日子，原因多數是想知道每日宜忌，說穿了即是看通勝；後來推出的掛牆日曆，就是為了方便大家翻查，故日曆可算是通勝的衍生物。
從前日曆多會釘在鐵牌上，作廣告宣傳之用，通稱為月份牌。月份牌曾風靡一時！據萬昌行負責人表示，新界區買傳統日曆的人一直沒有減少，而且近十年，還有一批內地客，每到新一年都會到香港大批搜括，佢哋話香港日曆準確度較高、較可靠！
舊曆潮居玩衝突
舊式月曆，唔係人人掛得起！自命潮居，掛後要有點點違和衝突感先至叫Good，正如G.O.D玩老香港情懷永遠不死！紅白藍都可以再重新包裝；如果只係家住陋居，「硬掛」只會予人一種老掉牙感覺。
靠得住 通勝名牌
說傳統日曆，蔡伯勵同李憲章你一定要識！佢哋兩位都係中港知名堪輿學家，堪稱通勝權威，所寫每日宜忌，絕對值得你參考！你屋企附近文具店求祈都有個？話你知日曆都有盜版㗎！無良者可能會套用過時通勝內容，真係信佢一成隨時雙目失明！
加鐵牌 新可變舊
掛曆頂塊鐵牌同膠牌，原來係可以單獨購買㗎！只要你喜歡，就算已有新款掛曆，都可以扣在其上。
大陸佬 必搶曆王
這款全港最大日曆，有成18吋×21吋，差唔多可以成個人遮晒，據知好多大陸客特別鍾意，佢哋話呢款「曆王」放廳先夠霸氣！
新曆邊玩邊學嘢
HandMade綠色日曆
長春社話傳統逐頁撕嘅日曆已買少見少，為保留呢種傳統文化，所以出了這本綠色日曆！每頁所用嘅字同插圖，全以人手在卡紙上出，再用電腦拼合！而且還搵來非牟利社企，以人手、一針一線製作，限量4,000本，極珍貴！同傳統日曆一樣，佢都有每日宜忌，內容就變成環保資訊，例如「宜做惜花人、忌做採花賊」。
玩足365日
一年俾你玩足365日夠唔夠？呢款日曆每日都提供一款MiniGame，有數獨、拼字、迷宮、畫公仔、Shopping秘訣，真係乜都有！
WallArt自家貼
想發揮自己藝術細胞？呢款就啱晒你，跟月曆包五張WallArt貼紙，款式完全係「自選台」！
a.萬里行24797696
b.PageOne27782808
c.G.O.D28905555