馬時亨嫁女咁大件事，席上只見特首參選人梁振英（圖），唐英年就唔見影，有人放風話，唐唐唔喺受邀之列。但係，肥馬就將責任推喺君悅酒店身上，話因為酒店場地有限，所以有啲賓客「想請都冇辦法」，而且太多人想請，有時會掛一漏萬：「我唔會話你知，我有請邊個冇請邊個。（有冇向唐英年派帖？）我唔想comment。」明白晒。
獲邀嘅CY同老婆夜晚近8點至出現，被問到唐英年係咪應該同佢多啲同場辯論，CY即時點頭稱是。CY當然知道，要佢和唐唐同場辯論係「益咗佢」，狼係識計數啲。八方提提大家，其實同場仲有署理特首林瑞麟出現，但係佢嘅閃光燈唔夠CY多，亦冇記者問佢問題。