感染退伍軍人症嘅教育局長孫明揚仍然留醫，孫太噚日同八方報平安，話孫公食多兩日抗生素後，有望後日出院過除夕。究竟孫公家乜嘢環境？孫太話孫公呢幾日條氣順番又食番嘢；平安夜出過去見一對孫，所以心情相當愉快。至於呢幾日嘅聖誕活動，就係由醫生同佢溫書，「睇吓洗肚嘅程序啱唔啱，順便休息一吓」。
連日來孫太一時帶海鮮蒸乳酪，一時帶雲吞麪畀孫公食，佢噚日澄清孫公一啲都唔為食，口味仲好清淡，獨沽兩款最愛美食：雲吞麪同及第粥。點解呢兩日唔見孫太探病？原來佢走秘道，孫太承諾孫公出院時一定通知傳媒，仲話孫公一定做埋餘下半年任期。